धर्म
तिथे नाही धर्म । जिथे हिंसाचार ।
धर्म सदाचार । शिकवतो ।।
मारणे सोडून । प्रेम देत जावे ।
समतेचे गावे । गीत सदा ।।
क्रोध, अभिमान । नाही करायचे ।
सत्य बोलायचे । दरवेळी ।।
डोळे, कान, नाक । शुद्ध सदा ठेवा ।
माणसांची सेवा । करताना ।।
माणुसकी ठेवा । आपल्या हृदयी ।
संकट समयी । भिऊ नका ।।
दया, क्षमा, शांती । प्रत्येक धर्मात ।
सर्वांच्या मनात । हेचि असो ।।
स्वानुभवे करा । ज्ञान आत्मसात ।
सदा वाचनात । मग्न व्हावे ।।
धर्म माणुसकी । नाही त्यात स्वार्थ ।
धर्मासाठी पार्थ । लढा देतो ।।
अजु कर्मामध्ये । धर्म आहे जाण ।
कर्मची महान । सर्वांपेक्षा ।।
©️®️शब्दसखा-अजय रमेश चव्हाण, तरनोळी,